ਸ਼ਬਦ ਚਾਨਣੀ---ਨਿਰਮਲ ਦੱਤ
ਦੋਹੇ
ਮਿੱਟੀ ਦਾ ਘਰ ਸਜ ਰਿਹਾ, ਮਿੱਟੀ ਦਾ ਸਾਮਾਨ,
ਮਿੱਟੀ ਮਾਲਕ ਬਣ ਰਹੀ, ਮਿੱਟੀ ਦੇ ਮਹਿਮਾਨ.
ਵਜਦ-ਵਜਦ ਹੋ ਗਾ ਰਿਹਾ ਇੱਕ ਨੱਚਦਾ ਦਰਵੇਸ,
"ਮੈਂ" ਮਿੱਟੀ ਦੀ ਮਹਿਕ ਹੈ, ਮਿੱਟੀ
"ਮੈਂ" ਦਾ ਵੇਸ.
ਇੱਕੋ ਸੱਚ ਸੁਣਾ ਰਹੇ ਜੱਗ ਦੇ ਰੂਪ ਅਨੇਕ,
ਮਿੱਟੀ "ਮੈਂ" ਦੀ ਤਰਜ਼ ਹੈ, "ਮੈਂ" ਮਿੱਟੀ
ਦੀ ਹੇਕ.
ਹੋਰਾਂ ਦੇ ਰੰਗ ਕੀ ਕਰਾਂ, ਮੈਂ ਚੱਲਿਆਂ ਮੁਰਝਾ,
ਅਪਣੇ ਇਸ ਮੁਰਝਾਉਣ ਦਾ ਕਿੰਝ ਕਰਾਂ ਦੱਸ ਚਾਅ?
ਪੱਤੀ-ਪੱਤੀ, ਰਾਤ-ਦਿਨ ਸਭ ਫੁੱਲ ਜਾਂਦੇ ਬੀਤ,
ਰੁੱਤ-ਰੁੱਤ ਮੁੜ ਕੇ ਫਿਰ ਕਰੇ ਫੁੱਲਾਂ ਨੂੰ ਸੁਰਜੀਤ.
ਸੁੱਕੇ ਪੱਤੇ ਗਾ ਰਹੇ ਹਰਿਆਲੀ ਦੀ ਯਾਦ,
ਬੀਜ-ਬੀਜ ਹੈ ਦੇ ਰਿਹਾ ਕੂਲ਼ੀ-ਕੂਲ਼ੀ ਦਾਦ.
ਨਜ਼ਮਾਂ
ਚੰਨ ਦੀਆਂ ਚਿੱਪਰਾਂ
ਥੱਕੀ-ਜਿਹੀ ਸਵੇਰ
ਬੈਠੀ ਰਾਤ ਦੀਆਂ ਕਾਤਰਾਂ ਫਰੋਲ਼.
ਚੰਨ ਦੀਆਂ ਚਿੱਪਰਾਂ
ਜੋ ਰਾਤੀਂ ਚੋਰੀ ਤੋੜੀਆਂ ਨੇ
ਕੁਝ ਤੇਰੇ, ਕੁਝ ਮੇਰੇ ਕੋਲ਼.
ਨੇਫੇ ਵਿੱਚੋਂ ਕੱਢ
ਕਿਤੇ ਚੇਤੇ 'ਚ ਲੁਕੋ ਕੇ ਰੱਖੀਂ
ਪਲਾਂ ਦੇ ਇਹ ਤੋਹਫ਼ੇ ਅਨਮੋਲ.
ਏਹਨਾਂ ਨੇ ਹੀ ਕੰਮ ਆਉਣਾ
ਸੁੰਨੇ-ਸੁੰਨੇ ਵੇਲ਼ਿਆਂ 'ਚ
ਚਿੱਤ ਜਦੋਂ ਐਵੇਂ ਜਾਊ ਡੋਲ.
ਏਹਨਾਂ ਦਾ ਕਮਾਲ ਵੇਖੀਂ
ਜਦੋਂ ਵੀ ਸਤਾਊ ਤੈਨੂੰ
ਕਾਲ਼ੇ-ਕਾਲ਼ੇ ਦਿਨਾਂ ਦੀ ਭੂਗੋਲ.
ਲਾਲਸਾ
ਇੱਕ ਟੁੱਟਿਆ ਤਾਰਾ
ਮੇਰੇ ਦਰਵਾਜ਼ੇ 'ਤੇ ਆਇਆ,
ਮੈਂਨੂੰ ਕਹਿੰਦਾ
ਮੇਰੇ ਕੋਲ਼ੇ
ਤਾਜ ਮਹਿਲ ਤੋਂ
ਕਿਧਰੇ ਵਧੀਆ
ਸ਼ੋਹਰਤ ਹੈ ਇੱਕ,
ਹਰ ਕੀਮਤ ਤੋਂ ਮਹਿੰਗੀ
ਇੱਕ ਸਵਰਗਾਂ 'ਚੋਂ ਚੁੱਕੀ ਨਾਗਮਣੀ ਹੈ,
ਤੇ ਹਰ ਫੁੱਲਾਂ-ਲੱਦੀ ਰੁੱਤ ਤੋਂ ਵਧਕੇ ਦਿਲਕਸ਼
ਭਾਰੇ ਅੰਗਾਂ ਵਾਲੀ ਨੰਗੀ ਪੱਤਝੜ ਵੀ ਹੈ;
ਕਹਿੰਦਾ ਮੈਂਨੂੰ
ਮੇਰੇ ਕੋਲ਼ੋਂ
ਬੇਸ਼ੱਕ ਇਹ ਸਾਰਾ ਕੁਝ
ਲੈ,
ਲੈ
ਮੈਂਨੂੰ ਅਪਣੇ ਸੁਪਨੇ ਦੇ, ਦੇ
ਮੈਂਨੂੰ ਅਪਣੀ ਸ਼ਾਇਰੀ
ਦੇ,
ਦੇ.
ਉਸ ਤਾਰੇ ਦੀ ਇਹ ਗੱਲ ਸੁਣ ਕੇ
ਮੈਂਨੂੰ ਉਸ 'ਤੇ ਹਾਸਾ ਆਇਆ
ਮੈਂ ਉਸ ਨੂੰ ਹੌਲ਼ੀ ਜਿਹੀ
ਚੁੱਕ ਕੇ
ਫਿਰ ਤੋਂ ਅੰਬਰ 'ਤੇ
ਚਿਪਕਾਇਆ.
ਸੰਪਰਕ –
#3060, 47-ਡੀ,
ਚੰਡੀਗੜ੍ਹ।
ਮੋਬਾਈਲ -98760-13060
Contact –
Nirmal Datt
# 3060, 47-D,
Chandigarh.
Mobile-98760-13060
%20(1).jpeg)
.jpeg)
0 Comments
ਦੋਸਤੋ ਅਗਰ ਰਚਨਾ ਪਸੰਦ ਆਈ ਤਾਂ ਆਪਣੇ ਵਿਚਾਰ ਕਮੈਂਟ ਬਾਕਸ ਵਿੱਚ ਜ਼ਰੂਰ ਲਿਖੋ। ਕਮੈਂਟ ਦੇ ਨਾਲ ਆਪਣਾ ਨਾਮ ਪਤਾ ਵੀ ਜ਼ਰੂਰ ਲਿਖੋ ਜੀ।ਇਸ ਪੋਸਟ ਨੂੰ ਤੁਸੀਂ ਆਪਣੇ ਸ਼ੋਸਲ ਮੀਡੀਆ ਅਕਾਊਂਟ 'ਤੇ ਸ਼ੇਅਰ ਵੀ ਕਰ ਸਕਦੇ ਹੋ।ਸ਼ੇਅਰ ਕਰਨ ਲਈ ਇੱਥੇ ਦਿਖਾਈ ਦੇ ਰਹੇ ਸ਼ੋਸਲ ਮੀਡੀਆ ਦੇ ਉਸ ਚਿੰਨ ਉੱਪਰ ਕਲਿੱਕ ਕਰੋ ਜਿਸ ਉੱਪਰ ਤੁਸੀਂ ਪੋਸਟ ਨੂੰ ਸ਼ੇਅਰ ਕਰਨਾ ਹੈ। ਉਸ ਤੋਂ ਬਾਅਦ ਸ਼ੇਅਰ ਕਰ ਦਿਓ।
Friends, if you like the article/story/poetry, then write your thoughts in the comment box. Please write your name and address along with the comment. You can also share this post on your social media account. To share, click on the social media icon on which you want to share the post. After that share it.